Работодавецот да го плаќа ПЦР тестот ако тој не сака да се вакцинира против коронавирусот, а вработениот во јавните и приватни установи да добие два слободни платени денови ако се вакцинира

Работодавецот, а не вработениот да го плаќа ПЦР тестот ако тој не сака да се вакцинира против ковид-19, а вработениот во јавните и приватни установи да добие два слободни платени денови ако се вакцинира, договорија вечерва министерот за здравство Венко Филипче со претседателите на Сојузот на синдикатите на Македонија Дарко Димовски и на Самостојниот синдикат за здравство, фармација и социјална заштита, Љубиша Каранфиловски.

За овој предлог, како и предлогот за задолжителна вакцинација против ковид-19 за здравствените работници ќе се одлучува на утрешната седница на Влада.

Комисијата за заразни болести на 17 ноември препорача задолжителна вакцинација против ковид-19 за здравствените работници и препорака за вакцина за вработените во јавниот сектор и локална самоуправа за да може да одат на работа. Филипче тогаш кажа дека препораката за вработените во државните институции се однесува на примена најмалку една вакцина, или негативен ПЦР тест, еднаш неделно на сопствен трошок, или потврда за прележан ковид , или потврда од лекар специјалист дека не се препорачува вакцината, поради имунозагрозувачки болести.

Филипче кажа дека од Синдикатите побарале од денот на донесување на одлуката, да се дадат 15 денови за да почне да се применува, со цел да се остават денови за едукација на членството во синдикатите. Одлуката за здравствените работници би важела по 30 дена од донесувањето.

Министерот додаде дека во земјава не е детектиран “делта плу“с сојот на ковид-19, кој прави уште повеќе проблеми. Тој рече дека болниците се полнат со невакцинирани пациенти, односно процентот на невакцинирани, а хоспитализирани се движи од 75% до 80%.

Вакви, но и доста поригорозни мерки има насекаде во регионот, Бугарија, Хрватска, Словенија, Грција, како и Австрија, Холандија.

Moжеби ќе ве интересира