Денеска во просториите на Ракометната федерација на Македонија (РФМ) беа извлечени групите за Купот на Македонија во машка конкуренција. Натпреварите од групната фаза ќе се одиграат на 26/27 април, додека завршниот турнир ќе се игра од 15 до 18 мај.
Екипата на Фруитленд Борец се најде во група 3 заедно со екипите на Вардар 1961, Бутел и Еурофарм Пелистер 2. Ждребката посака во четвртфиналето велешани да се сретнат со прволигашот од Битола, Еурофарм Пелистер 2. Победникот од овој дуел ќе се сретне со победникот од натпреварот Вардар 1961 и Бутел, по што ќе го добиеме полуфиналистот на ракометниот Куп на Македонија.
Бранителот на титулата Алкалоид се најде во група 1 заедно со две прволигашки екипи, Мултиесенс и Партизан Гевгелија, како и Пролет. Еурофарм Пелистер ќе има лесна задача да стигне до Ф4, бидејќи ќе игра со три екипи што се борат за опстанок, Куманово, Струга и Радовиш. Во групата 4, Охрид и Тиквеш ќе бараат пласман на завршниот турнир преку Прилеп и Аеродром.
Допрва ќе бидат познати евентуалните домаќини на четирите групи, а доколку нема пријавено организатори, тогаш финалниот натпревар од групата ќе се игра на теренот на екипата со помал број.
