Младиот голман на ракометниот клуб Фруитленд Борец, Димитар Пецев, се најде на поширокиот состав од 49 ракометари на новиот селектор на кадетската ракометна репрезентација на Македонија, Горан Кузманоски. Станува збор за селекција составена од ракометари родени 2008 година и помлади, која ќе се подготвува за настап на престојниот Европски олимписки младински фестивал Скопје 2025.
Ова е прво официјално собирање на оваа генерација, а во следниот период се предвидени дополнителни подготовки и селективни тренинзи, со цел оформување на конкурентен тим што ќе ја претставува Македонија на еден од најголемите младински спортски настани во Европа.
Повикот за Пецев претставува значајно признание за неговата работа, талент и ангажман, но и поттик за понатамошен развој и посветеност на ракометниот спорт.
