Годинешниот лауреат на престижната награда за најдобар актер „Деспот Ѓураѓ Бранковиќ“ на 12. издание на фестивалот „Театар на тврдината“, кој се одржа во уникатниот простор на Малиот град на Смедеревската тврдина е актерот на велешкиот театар Исидор Јованоски, за маестралната интерпретација на ликот Тригорин во претставата „Галеб“ од Антон Павлович Чехов, во режија на Александар Ивановски.
Одлуката за добитниците на наградите ја донесе стручно жири составено од истакнати професионалци: драмската уметница Исидора Миниќ, театрологот д-р Зоран Максимовиќ и претседателот на жирито Горан Ибрајтер, писател и извршен директор на престижното „Стеријино позорје“ од Нови Сад.
Ова признание е уште едно во низата потврди за актерскиот квалитет, посветеност и силната сценска енергија што Јованоски ја вложува во секоја своја улога. Неговата изведба во „Галеб“, класичниот текст на Чехов, доби големи пофалби и од критиката и од публиката, истакнувајќи го како еден од највпечатливите актери на регионалната сцена.
