Ракометните кадети на Еурофарм Пелистер го добија дербито на кадетската ракометна лига група А, против домаќинот Фруитленд Борец и го совлада со високи 40:26, полувреме 20:10.
Гостите од Битола беа поквалитетен противник на овој натпревар. Го имаа водството уште од самиот старт кое постојано се зголемуваше. Доколку на голот на Фруитленд Борец не беше расположен за игра голманот Димитар Пецев, гостите ќе имаа и поголема предност. Во вториот дел поангажирана игра во одбраната на велешани вроди со плод, па во 44 минута од натпреварот дојдоа и на минус пет, 20:25, но тоа беше се што успеаја да направат. Во продолжение тренерот на Фруитленд Борец им даде шанса скоро на сите ракометари, а тоа го искористија битолчани кои ја зголемија предноста за конечни 26:40.
Најефикасен кај домашниот тим беше Андреј Зафиров со седум постигнати погодоци, додека шест постигна Лука Станковски. Кај победничката екипа Андреј Георгиев постигна 11 погодоци. За велешани ова беше прв пораз во првенството и по девет одиграни кола се наоѓаат на втората позиција. Наредниот викенд на домашен терен ќе го пречекаат составот на Овче Поле 1958 од Свети Николе.
