Новиот шеф на стручниот штаб на Борец 1919 АД, Горан Симов дебитираше со реми на незгодното гостување во Куманово, кај Башкими, екипа со сериозни амбиции за влез во Првата македонска фудбалска лига.
Во доста тврд натпревар, велешани успеаја да го освојат првиот бод на гостувањата во 15 минута од судиското надополнување. Претходно домаќините поведоа со ефектен гол од далечина преку Христијан Митревски во 83 минута. Поради истекување на вода на теренот, натпреварот беше во прекин 15 минути. Во судиското надополнување, по еден центаршут на Стефан Ристовски, Христијан Митревски си постигна автогол, за голем бод за Борец 1919.
Со денешното реми, Борец 1919 остана на 15 место, сега со шест освоени бода. Во наредното коло во Велес се игра дербито за опстанок во Втората фудбалска лига, помеѓу Борец 1919 и Победа Прилеп.
