Вчера во Велес се одигра натпревар од последното девето есенско коло во Првата македонска футсал лига. Домаќин на овој натпревар беше екипата на КМФ Проект, кој го пречека составот на КМФ Јувентус Серава.
Иако на хартија ова требаше да биде лесна задача за домашниот тим, гостите неочекувано славеа на овој натпревар со резултат 2:1. Поведоа домаќините преку Стојановски во 16 минута, а пред крај на првиот дел израмни Алијевиќ. По многуте нереализирани шанси на КМФ Проект следуваше казна, па Мамуд со гол преку цел терен во 38 минута го постави конечниот резултат.
КМФ Проект ќе презими на третата позиција на табелата со освоени 19 бода, додека КМФ Јувентус Серава се искачи на петата позиција со освоени 10 бода.
