![izbori_2020_1](https://batali.net/wp-content/uploads/izbori_2020_1.jpg)
Државната изборна комисија го усвои протоколот за престојните избори предложен од Комисијата за заразни болести.
Секој гласач е должен да држи растојание од 1,5 до 2 метра пред објектот и влезот на самото гласачко место. Пред влегување и на излегување од гласањето, граѓаните ќе мора да ги дезинфицираат рацете. Како што кажаа од ДИК, гласачите не треба да носат заштитни ракавици, тоа е задолжително само за членовите на избирачките одбори.
„На гласачот нема да му биде дозволено да влезе во гласачкото место ако предходно не ги дезинфицира рацете и не носи маска“, вели Елизабета Постоловска – член на ДИК.
Маската смее да се извади само во моментот кога избирачкиот одбор треба да направи идентификација на гласачот.
„Гласачот е должен при покажувањето на лична карта, накратко да ја извади маската со цел за идентификација, а откако ќе се утврди идентификацијата, гласачот може да гласа. Овие се задолжителни чекори“, додаде Постоловска.
Гласачот е должен откако ќе гласа, гласачкото ливче да го пушти во кутијата, а потоа при излез повторно да направи дезинфекција на рацете.
Можеби ќе ве интересира: