Фондот за здравствено осигурување планира да направи измени во правилниците во однос на позитивната листа, со кои, меѓу другите, антикоагулантот „клексан“ ќе може да се подигне на рецепт во аптеките наместо да се прави рефундација.
Директорот на ФЗОМ, Сашо Клековски, рече дека на позитивната листа треба да бидат вклучени лекови што ќе бидат понудени по пониска цена и затоа даваат субвенција.
„Во прв план ни е префрлување на антикоагулантите бидејќи тие се веќе на болничката листа, на пример, ‘клексанот’. Да не се рефундира ‘клексанот’, туку да може да се подигне на рецепт. Се надевам дека што побргу, веднаш штом комисијата почне да функционира и се направат овие измени во правилниците, ќе го имаме првото зголемување со антикоагуланти“, изјави Клековски.
Додаде дека што се однесува до „ксарелтото“, кое е антикоагулант во таблетарна форма, и покрај нивната волја, производителите немаат желба да го вклучат тој лек на позитивната листа. Фондот се обидува да се договори со еден од производителите да биде вклучен лекот по пониски цени бидејќи кај повозрасната популација со кардиолошки проблеми е релативно често употребуван.
