Велешката видео продукција Live Streaming Production, како општествено одговорна компанија ѝ ги понуди своите услуги на Општина Велес во вид на спонзорство, за да реализира интернет стриминг на претстојниот Фестивал на велешката пита и вино „Питијада 2023“, кој ќе се одржи од 6 до 8 октомври. Идејата е да им се понуди на иселениците со потекло од Велес, кои во моментот на одржувањето на Питијадата нема да бидат во својот роден град, да можат да ги проследат случувањата на трите фестивалски дена. Од продукцијата велат дека се решиле на ваков чекор, за да дадат придонес во организацијата на оваа традиционална манифестација, но и да се види и слушне за Велес и неговата традиција, посебно за питата пастрмајлија, што повеќе низ светот.
„Без размислување ги понудивме нашите ресурси за оваа манифестација. Ние сме продукција со седиште во Велес и секогаш кога можеме, ќе помогнеме на нашиот град. Сепак, иако нашата понуда до општината беше испратена на 21 септември, оттаму до денеска сѐ уште не сме добиле одговор дали го прифаќаат спонзорството“, велат од Live Streaming Production.
Оваа продукција во своето портфолио има многу проекти како што се директни преноси од Европското првенство во кајак на диви води – спуст 2023, одржано на патеката на Матка, Балканското првенство во кајак на диви води – спуст 2023, одржано на патеката на реката Вардар во Велес, Велешките спортски игри 2022, безброј концерти, фестивали и спортски натпревари.
Можеби ќе ве интересира:
