Мостот кај Башино село од недела се пушта за сообраќај. Јавното претпријатие за државни патишта (ЈПДП) доцна вечерва издаде одобрение за времен режим на сообраќај, по една лента, а ќе биде регулиран со семафор. Сообраќајот ќе почне да се одвива по мостот 24 часа откако медиумите ќе известат за оваа одлука, а во текот на утрешниот ден треба да се тргнат времените барикади од двете страни на мостот. Од ЈПДП за Батали.нет велат дека пуштањето на мостот најверојартно ќе се случи во недела наутро.
„Јавното претпријатие за државни патишта известува дека врз основа на Одобрение за времена измена на режимот на сообраќај за време на санацијата на мостот на река Вардар на регионалниот пат Р1312 делница: Башино село – Велес, ќе го стави во времен режим на сообраќај. Времениот режим на сообраќај ќе се одвива согласно со изготвениот Сообраќаен проект за времено одвивање на сообраќајот и со поставување на соодветна сообраќајна сигнализација и опрема на патот, а движењето на сообраќајот ќе биде регулирано со светлосна сигнализација по една сообраќајна лента по средината на мостот. ЈПДП ги известува граѓаните дека времениот режим ќе стапи на сила 24 часа по објавувањето на ова известување во електронските и пишаните медиуми“, велат од ЈПДП.
Мостот на северниот влез на Велес е затворен за сообраќај од 3 јануари, откако по вонредна инспекција, експертите од Градежниот факултет открија сериозни оштетувања, па издадоа забрана за движење. Поради тоа, во последните два месеци во градот се случува секојдневен сообраќаен метеж, а од едната страна ан градот до другата се патува и до еден час.
Мостот е стар 54 години, а сериозните оштетувања се детектирани уште пред седум години, кога тогашниот градоначалник на Велес Аце Коцевски, по мерењата на експертите, апелираше дека државните власти мораат да преземат мерки, за да не се случи трагедија.
Актуелниот градоначалник Марко Колев изјави дека затворањето на мостот е едиственото решение засега, бидејќи во спротивно може да се случи поголема трагедија. Тој, заедно со премиерот Христијан Мицкоски и министерот за транспорт Александар Николовски пред месец и половина го посетија мостот и ветија дека за два до три месеци ќе биде саниран, а во исто време ќе се почне со проектирање и изградба на нов мост, на 50 метри од постоечкиот.
