Денеска во Кавадарци свечено беше пуштен во употреба Регионалниот центар за згрижување на бездомни миленици и ветеринарно здравство, кој ќе ги опслужува сите општини од Вардарскиот плански регион. Станува збор за прв објект од ваков вид во регионот, со кој ќе се обезбеди хуман третман на уличните животни и ќе се унапреди јавното здравје и безбедноста на граѓаните.
На свеченоста присуствуваа премиерот Христијан Мицкоски, министерот за локална самоуправа Ристо Перински, министерот за животна средина Ибрахим Меџити, градоначалникот на Велес Марко Колев, градоначалникот на Кавадарци Митко Јанчев, како и градоначалниците на останатите општини од регионот.
Центарот е изграден во рамки на проектот „Одржлив и инклузивен рамномерен регионален развој“, и ќе ги опслужува општините Свети Николе, Лозово, Чашка, Велес, Градско, Росоман, Кавадарци, Неготино и Демир Капија. Неговата главна функција ќе биде згрижување, третман и ресоцијализација на бездомните животни, со што се очекува значително намалување на инцидентите и штетите предизвикани од нив.
