Нема потреба за нови рестрикции, акцент се става на вакцинацијата

Во овој момент епидемиолошката состојба во земјава е мирна и не се размислува да се бара потврда за вакцинација или негативен тест на коронавирусот за влез во земјава, ниту за наши, ниту за странски државјани, но акцент треба да се стави на вакцинацијата како механизам за заштита, изјави денеска министерот за здравство Венко Филипче.

Министерот посочи дека нема никаква логика за едни граѓани да се бара, а за други да не се бара потврда за вакцинација или негативен тест ако престојувале во странство.

„Во таа смисла сега ситуацијата е навистина мирна. Имаме различни сценарија во различни земји во кои и покрај тоа што има рестриктивни мерки во смисла на тоа да се бараат документи, има огромен пораст на случаите. И затоа ставаме акцент на вакцинацијата како единствен механизам да се зголеми колективниот имунитет и да се спречи нов бран“, изјави министерот за здравство Венко Филипче.

Тој посочи дека во Велика Британија има огромен број нови случаи, но битно е дека нема смртни случаи и тоа е суштината, што се постигнува со вакцинацијата.

„Така се конструирани и нашите политики. Со сите овие механизми што ги имаме – кампањите, теренската вакцинација…, да се вакцинираат што поголем број на граѓани. Веројатно ќе има и нови соеви на вирусот, веројатно ќе има и нови мутации. Меѓутоа, со рестрикции не можеме да живееме. Вака ќе го вратиме нормалниот начин на живот“, изјави Филипче.

Можеби ќе ве интересира: