Љупчо Палевски Палчо, првообвинет за убиството на 14-годишната Вања Ѓорчевска и на 74-годишниот Панче Жежовски, додека бил во Белград, знаел дека го бара полицијата. Ова денеска пред судот го сведочеше Ламбе Бучков кој го знаел Палевски повеќе од 20 години и со кого телефонски разговорал во тој период.
Палевски му рекол дека Влатко Кешишев кој, исто така, е обвинет во случајот, го информирал дека полицијата била во партијата „Десна“ и дека бара одреден пикап кој бил поврзан со исчезнувањето на некое девојче. Палевски на Бучков му рекол дека планира да замине во Софија, па во Турција бидејќи таму поради претстојните избори имал состаноци со политички партии со кои соработувал.
Инаку Бучков сведочеше дека Палевски немал пари и негов имотен пријател му дал 15.000 евра како аванс со цел од него да земе земјиште за изградба на зграда. Но, бидејќи не било издадено одобрение за изградба на зграда, Бучков ги барал парите назад и затоа во периодот на исчезнувањето на Ѓорчевска, често комуницирал со Палевски.
Инаку Бучков, кој порано работел во МВР, сведочеше и дека знаел дека Палевски поседува неколку оружја, но никогаш не го видел истите да ги носи. Сведочеше и Ерол Османи кај кого Палевски, ден по грабнувањето на Ѓорчевска на 28 ноември минатата година, бил дома да поправи котел за греење. Палевски дошол со пикап на кој му била удрена вратата кај возачот. Палевски притоа не му кажал дека планира да отпатува некаде. На денешното судење ќе сведочи и Стефан Димковски кој го носеше Палевски од Белград за Турција.
