Папата Франциск, кој почина во понеделникот на 88-годишна возраст, денеска ќе биде погребан во Рим, во церемонија која ќе привлече бројни верници и високопрофилни гости од целиот свет.
Погребната церемонија ќе започне во 10 часот по локално време на Плоштадот Свети Петар, каде што се очекува присуство на десетици илјади верници, како и делегации од над 170 земји. Миса ќе предводи кардинал Џовани Батиста Ре, декан на Колегиумот на кардиналите.
Промени во традицијата на папски погреби
Папата Франциск, кој беше познат по својата скромност, реши да се откаже од традиционалната раскошна церемонија на погребите, кои традиционално вклучуваат три ковчези. Наместо тоа, тој побара да биде погребан во едноставен дрвен ковчег обложен со цинк. „Достоинствено, но не на перници“, изјави Папата, објаснувајќи дека не сака да биде дел од традиција која ја сметал за премногу раскошна.
Последен почив: Санта Марија Маџоре
За разлика од неговите претходници, кои беа погребани во гробниците под базиликата Свети Петар, Папата Франциск избра да биде погребан во базиликата Санта Марија Маџоре. Ова маријанско светилиште беше едно од неговите омилени места за молитва. Франциск многу пати ја посетувал базиликата пред и по своите патувања. Во едно интервју пред неколку години, тој рече: „Местото е подготвено. Ветив на Девицата дека таму ќе бидам погребан.“
Светски лидери на погребот
Меѓу високите гости на церемонијата се и претседателот на САД Доналд Трамп, заедно со сопругата Меланија, францускиот претседател Емануел Макрон, украинскиот претседател Володимир Зеленски, италијанскиот претседател Серџо Матарела, британскиот принц Вилијам и премиерот Кир Стармер, како и кралската двојка од Шпанија – кралот Фелипе и кралицата Летиција.
На погребот ќе присуствуваат и бројни други лидери од Латинска Америка, како што се бразилскиот претседател Лула да Силва и аргентинскиот претседател Хавиер Милеј, како и политички фигури од различни региони, вклучувајќи ги претседателите на Хрватска, Србија и Црна Гора.
Безбедноста на највисоко ниво
Со оглед на големината на настанот и бројот на присутни делегации, Рим е под засилени безбедносни мерки. Ватикан заедно со италијанските власти обезбедува безбедност со повеќе од 2.000 полицајци, специјални единици и софистицирана безбедносна опрема. Во градот се распоредени и борбени авиони кои патролираат, а се користат и анти-дрон системи за спречување на какви било закани.
Над 400 сообраќајни полицајци ќе го регулираат сообраќајот и ќе ја обезбедат безбедноста на дипломатските конвои.
