Пуштен во употреба експресниот пат Дреново – Фариш

Денес го пуштаме во употреба експресниот пат Фариш- Дреново, во должина од 10,2 километри, со вредност од речиси 45 милиони евра- проект што е директна инвестиција во развојот, безбедноста и иднината на овој регион, на државата, на секој граѓанин, изјави премиерот, Христијан Мицкоски.

„Овие пари, како во минатото, по принципот како до сега, не завршија во нечии џебови, не исчезнаа во провизии, тендери и фиктивни договори. Туку се тука, пред вас. Во асфалтот. Во оваа делница. Во реални, опипливи дела. Дојде време кога државата не е банкомат за моќници, туку мотор на развојот. Дојде време кога проектите не се рекламираат на хартија, туку се градат на терен. Дојде време кога парите од граѓаните- се враќаат назад кај граѓаните, преку проекти, патишта, училишта, фабрики“, рече Мицкоски.

Додаде дека патот Фариш- Дреново, не е само обичен пат туку тој е и порака.

„Порака дека можеме поинаку. Порака дека ако се сака- се може. И доказ дека Македонија нема да биде вечно во застој ако што беше изминатите седум години, туку цврсто граби на патот кон напредокот. Граѓаните имаат очекувања. И ние тие очекувања нема да ги изневериме“, рече Мицкоски.

И  СДСМ се пофали дека патот низ Фаришката клисура, делницата на експресниот пат од Дреново до Градско, што е завршен сега 90 отсто е дело на нивната влада, а не на актуелната иако, како што велат, се кити со туѓи перја.

 

„Задоволството е поголемо заради огромното значење за граѓаните кој овој пат го има не само за Прилеп и прилепчани, туку и за граѓаните на Битола, Ресен и од целиот Пелагониски регион. Горди сме затоа што СДСМ во својот мандат заврши над 90% од работите овој проект“, велат од партијата.

Завршени беа 2 тунели со вредност од околу 6 милиони евра кои беа најсложени за изградба.-Асфалтирани беа над 95% од вкупната должнина на патот.Изградени беа сите клучни конструктивни елементи: 21 мост, 11 потпорни ѕидови, 15 пропусти, еден вијадукт, една галерија.

Проектот долг 10,2 километри, со вредност над 33 милиони евра, најтешкиот и најкомплексен дел од трасата во Фаришката клисура го заврши Владата на СДСМ. Што направи ВМРО-ДПМНЕ? За цела една година  заврши мал дел,  санираше само едно свлечиште,  постави бетон од 10 метри, заврши дел од сигнализацијата и дел од оградите. И она најважното за нив,  се китат со туѓи перја, се сликаат пред камерите и  го претставуваат овој проект како свој.Но, сепак добра вест за граѓаните е дека кончено патот е завршен. Дека граѓаните од целиот пелагониски регион добиваат пат значаен за економијата, транспортот и безбедноста, рече Талески.

 

Тој потсети дека СДСМ многу инвестирала во различни проекти, особено во патната инфраструктура. Експресниот пат Градско –Дреново е исто така проект на СДСМ, обновата на патната делница кај Плетвар, патот од Прилеп кон езерото, почетокот на реализацијата на стратешкиот проект за автопат Прилеп-Битола како дел од Коридорот 10д и така натаму.