Совет на амбасадори: Македонскиот идентитет не смее да биде предмет на негирање

Македонскиот национален идентитет е историска, општествена и политичка реалност, исто како и идентитетите на другите етнички заедници во нашата земја, реагираше Советот на амбасадори.

По најавите дека македонскиот јазик и идентитет ќе бидат избришани од Извештајот на Европскиот парламент, од Советот порачуваат дека македонскиот идентитет не смее да биде предмет на негирање, условување или политизација во рамките на процесот на пристапување, ниту, пак, сведуван на симболични или тривијални одредници.

 

„Ги поздравуваме напорите на сите релевантни политички чинители во земјата да застанат обединето во заштита на овие темелни вредности. Истовремено, нагласувајќи ја цврстата определба за ЕУ – интеграција на земјата, веруваме дека европските партнери и институции ќе останат доследни на принципите на почитување, еднаквост и инклузивност ,врз кои е изградена Унијата“, порачуваат од Советот на амбасадори.

 

Советот ја повика и власта доследно да ги спроведе реформите, предвидени со Планот за раст.