За неполни 24 часа речиси собрани потребните пари за лекување на велешанецот Јордан Ивев

За неполни 24 часа откако го објавивме повикот за хуманитарна помош, огромен број граѓани од земјава и странство донираа пари за лекување на 25-годишниот велешанец Јован Ивев. Најголема заслуга за тоа има фејсбук заедницата. Веднаш по нашата објава вчера на фејсбук беше поставен т.н. „фандрајзер“, дело на велешанецот кој живее во Австралија Никола Џипунов и оттогаш донираната сума постојано расте.

До овој момент собрани се близу 16 илјади австралиски долари или речиси 10 илјади евра. Со оглед на тоа дека фејсбук донацијата сè уште трае, а вчера се пуштени и телефонски броеви за донации и денарска и девизна жиро сметка, конечната сума веројатно ќе биде многу повисока, а целта, Јован повторно да застане на нозе, ќе биде остварена.

Македонскиот народ уште еднаш покажа дека има силно емпатично чувство и секогаш кога е најпотребно, брзо се мобилизира и помага онаму каде што треба.

Јован Ивев остана неподвижен кога лани во септември, во Ротердам, Холандија, каде што работел како возач на камион, цевки тешки 2,5 тони при истовар паднале врз неговото тело и го згмечиле. Јован останал без кислород и срцева реакција, па лекарите од брзата помош морале да го реанимираат и по неколку минути го вратиле во живот. Јован добил тешки повреди на главата, градниот кош, абдоменот, карлицата и нозете.

Во болницата во Холандија младиот велешанец е хоспитализиран три месеци, по што, за понатамошно лекување е испратен во Македонија . Поставена му е дијагноза Dg. QUDRIPARESIS. St. Post. Plytraumatismus.

Во моментов тој е неподвижен и за негово лекување потребни се 10.000 евра. Со овие пари треба да се плати рехабилитација и закрепнување во Поликлиника „Неуромедик“ од Ниш, Србија.

Повикот за донации е сè уште отворен, а освен преку фејбук, можете да донирате со јавување на следниве телефонски броеви или преку уплата на жиро сметка.