недела, 25 октомври, 2020
Реклама

Михајлов: Во недела ќе потврдиме дека сме екипа за респект!

Borec - Renova naslovna

Репрезентативната пауза е зад нас, а пред нас се новите возбудувања од Првата македонска фудбалска лига. На ред е деветтото коло, во кое велешки Борец на свој терен ја пречекува Македонија Ѓ.П. Натпреварот (недела, 14:30 часот) е и едно од двете дербија на колото, бидејќи се среќаваат две екипи од првата четворка на табелата, но и натпревар на екипи кои имаат добри серии. Скопјани веќе пет натпревари се без пораз, во кои само еднаш одиграа нерешено, а Борец минатото коло на Чаир во Скопје ја прекина серијата од четири натпревари без загубен меч.

И двете екипи имаат мотив да ги освојат бодовите и да се зацврснат во горниот дел на табелата. На гостите би им одговарало и нерешено, бидејќи ќе ја продолжат позитивната серија и ќе држат чекор со водечките Шкендија и Шкупи, додека Борец ќе се обиде да се рехабилитира од поразот од 3:0 на гостувањето кај Шкупи и да се врати на победничка патека. Затоа, овој меч ветува интересен дуел, а тоа го потврдува и младинскиот репрезентативец на Македонија од редовите на Борец, Оливер Стојменовски.

„Покажавме дека сме екипа за респект, а тоа ќе го потврдиме и на неделниот натпревар. Македонија Ѓ.П. е во позитивна серија од пет натпревари без пораз, но ние веруваме во себе и одиме на три бода. Докажавме дека теренот во Велес е еден од најтешките за освојување бодови за гостинските екипи. Ќе дадеме сè од себе и во недела така да остане“, рече играчот од одбраната на Борец, Оливер Стојменовски.

gorazd mihajlov

За овој натпревар тренерот на велешани Горазд Михајлов може да смета на сите играчи, освен на поодамна повредениот стопер Никола Гавриќ, а на мала повреда се жали и Милан Чичевски. Михајлов вели дека репрезентативната пауза добро ја искористиле и очекува позитивен резултат.

„Поразот од Шкупи е веќе минато. Репрезентативната пауза ја искористивме максимално за претстојните натпревари. Македонија Ѓ.П. е добар тим, предводен од мојот пријател Жикица Тасевски, а местото на табелата тоа и го кажува, впрочем, ова ќе биде дуал на третиот и четвртиот на табелата. Ќе се обидеме да ја наметнеме нашата игра и ќе дадеме сè, за позитивен резултат. Се надевам дека ќе ги израдуваме велешани и ќе останеме во добар ритам и за следните натпревари“, рече тренерот Михајлов.

На табелата Борец е четврти со 12 бода, а следниот противник Македонија Ѓ.П. е место погоре и има четири бодови повеќе од велешани. Нивниот меѓусебен дуел се игра во недела, на Градскиот стадион „Зоран Паунов“ во Велес со почеток од 14:30 часот, без присуство на публика, поради корона-кризата.

Можеби ќе ве интересира: