Кривичниот суд определи мерка притвор за полициските службеници и царинските службеници кои вчера беа уапсени во големата акција на МВР.
„По произнесување на надлежниот јавен обвинител и осомничените во присуство на нивните бранители во однос на предлогот, судија на претходна постапка донесе решенија со кои го прифати предлогот и на 8 од осомничените им определи мерка притвор во траење од 30 дена, додека на еден од осомничените му определи мерка притвор во траење од 8 дена со оглед дека против истиот е поднесен предлог во скратена постака“, велат од Кривичниот суд.
Според решенијата за определување мерка притвор, судот сметал дека се исполнети условите од чл. 165 ст.1 т 1. 2. и 3. од ЗКП односно дека кај осомничените постои опасност од бегство, можност да влијаат врз сведоците или да ја попречат истрагата и опасност да го повторат делото.
Како што информираа од МВР, приведени се десет лица на возраст од 35 до 54 години, од кои петмина од Куманово, четворица од Скопје и едно од Тетово, меѓу кои и тројца полициски службеници и петмина царински службеници.
Деветмина од нив се сомничат дека извршиле кривично дело шверцување, а тројца дека сториле и кривично дело неовластено производство и пуштање во промет наркотични дроги.
При претрес кај едно од лицата бил пронајден и одземен кокаин.
Moжеби ќе ве интересира:
