Уште четири текстилни работнички заразени од коронавирусот

Нови четири текстилни работнички од Штип се заразени со корона вирус. Со тоа бројката на позитивни се искачи на десет. Сите се од истата конфекција што не работи веќе неколку денови, а ќе остане под клуч најмалку до крајот на неделава. Денес  се земени брисеви на уште шест лица поврзани со конфекцијата.  Две работнички се на домашно лекување, а четири со средна клиничка слика се на инфективно во Штип.

” Тие се со средна клиничка слика, во добра општа состојба, и во моментов имаме девет хоспитализирани пациенти на одделение”, изјави Ален Ѓоргиев директор на Клиничка болница Штип.

Во моментот епидемилозите се концентрирани на изолирање на работничките кои со заразените се возеле со ист автобус до работа. Станува збор за вработени од уште две други текстилни фабрики. Од епидемиолошката анкета ќе зависат и понатамошните чекори. Во изолација веќе се ставени 55 лица, станува збор за членови на семејствата и нивни непосредни контакти. Тоа ја зголемува опасноста од нов бран заболени, но од Клиничката болница во Штип велат дека се подготвени.

“Ќе ги искористиме сите капацитети што ги имаме. Дај боже да не треба да ги користиме. Ако се јави и таква потреба ќе се адаптираме на ситуацијата што ќе ја имаме”, вели Ален Ѓоргиев директор на Клиничка болница Штип.

Вчера од Државниот здравствен и санитарен инспекторат најавија и контрола на автобусите и почитувањето на заштитните мерки во нив. Општинскиот кризен штаб во Штип од вчера почна со таргетирана дезинфекција пред влезовите на конфекциите и автобусите, а од Центарот за јавно здравје испратија апел за почитување на мерките и задолжително носење заштитна опрема.