Пратеникот од крилото на Алијанса за Албанците на Арбен Таравари, Салим Сулејмани, објави дека поднел оставка од сите функции во партијата, но и од функцијата пратеник во Собранието. Тој објаснува дека неговиот политички ангажман произлегол од чувство на одговорност и желба за вистинска промена, а не од лична амбиција, нагласувајќи дека учеството во коалицијата ВЛЕН било мотивирано од потребата за соочување со, како што наведува, неуспесите на ДУИ и нивната злоупотреба на власта.
-Коалицијата ВЛЕН не беше случаен политички сојуз. Се роди како неопходен и одложен резултат на длабокото разочарување што Албанците го доживуваа со години од ДУИ, партија која повеќе од две децении е дел од владата и се претставува како легитимен претставник на Албанците, но реалноста покажа спротивното, таа се трансформираше во изолирана структура, тесно поврзана со лични и клански интереси, злоупотребувајќи ја моќта за богатење на неколку поединци и игнорирајќи ги проблемите на обичните граѓани. Партија која некогаш доаѓаше со ветување за достојна застапеност, но на крајот стана симбол на корупција, ароганција и заробување на државата. Станав дел од ВЛЕН затоа што верував дека оваа коалиција е создадена токму како антипод на оваа структура, како политичка алтернатива која има за цел да ја врати надежта, да ја врати правдата и да им даде на Албанците достојна застапеност што им недостасуваше со години, посочува Сулејмани.
-Зближувањето со ДУИ во пресрет на локалните избори донесе сериозно отстапување од принципите на кои бевме посветени. Оваа политичка соработка е прекршување на нашите ветувања и претставувањето што го заслужуваат албанските граѓани. Оваа акција е неприфатлива за мене, бидејќи не можам да бидам дел од сојуз кој е формиран за тесни политички интереси и со луѓе споменати на меѓународни црни листи поради вмешаност во сериозни работи, додава пратеникот.
Сулејмани истакнува дека неговата кауза не завршува тука, туку ќе продолжи уште посилно, но во други форми на ангажман, со цел, како што наведува, да служи на граѓаните уште поефикасно.
-Ветувам дека многу скоро ќе ги почувствувате резултатите и ќе ги видите трагите од мојот ангажман во иднина. Барам само трпение и разбирање, додека вистината не излезе целосно на површина, стои на крајот од објавата на Салим Сулејмани.
Претходно беше соопштено од вкупно 14 пратеници колку што имаше коалицијата ВЛЕН во Собранието, петмина застанаа како поддршка на крилото на Арбен Таравари во АА. Деветмина пратеници останаа на страната на ВЛЕН и владеачкото мнозинство.
