Проф. д-р Субиото е вонреден професор по македонски јазик и книжевност на Филозофскиот факултет при Универзитетот во Љубљана, каде што од 2004 година ја води Катедрата за македонски јазик и книжевност. Таа е истакнат македонист која три децении го афирмира македонскиот јазик, литература и култура на угледниот Универзитет во Љубљана, кој претставува расадник на македонистиката. Особено значајна е нејзината дејност на меѓународниот семинар за македонски јазик, литература и култура при Универзитетот “Св. Кирил и Методиј” во Скопје. Подрачјата на нејзиниот научен интерес се современата македонска книжевност, македонско-словенечките книжевни и културни врски, како и книжевниот превод, истакна членот на жири-комисијата, Снежана Бошевска.
По исцрпна стручна расправа за секоја од разгледуваните книги, жири-комисијата едногласно одлучи наградата “Рациново признание” за 2025 година да ѝ се додели на Оливера Ќорвезироска за делото “Три Марии” во издание на Арс Либрис од Скопје.
Според оценката на жирито, книгата “Три Марии” впечатливо го допрецизира авторскиот творечки интегритет на писателката Оливера Ќорвезироска во актуелната современа македонска литература. Ова ново прозно дело суверено ќе го обезбедува местото меѓу читателската и критичко-проследувачката јавност преку читање, препрочитување и стручно толкување од повеќе аспекти на пристапување кон неговата содржинска повеќеслојност, структурна интерактивност и теоретски-поетиколошка детерминираност. Рациновите средби претставуваат една од најзначајните литературни манифестации во Македонија, која традиционално се одржува во Велес во чест на големиот македонски поет Коста Солев Рацин.
62-те по ред Рацинови средби се одржуваат од 07 до 17 јуни под слоганот „Зборот од мугрите – аманет што не згаснува“. Свеченото отворање на Рацинови средби е во четврток, на 12 јуни во 20 часот во театарот„Јордан Хаџи Константинов-Џинот“ кога ќе бидат доделени и наградите, а претходно во фоајето на театарот изложба ќе има скулпторот Ангел Коруновски.
