Велешката полиција вчера спроведе претрес во домот на 84-годишниот Т.Ј. од Велес, при што биле откриени оружје и муниција, а во собата на неговиот син марихуана.
Како што информира МВР, акцијата е спроведена на 27 август околу 11:30 часот, со судска наредба и од страна на Отсекот за недозволена трговија со дрога и оружје при СВР Велес. При претресот биле одземени ловен карабин „Маусер“, ловна пушка „Бајкал ИЖ 12“, 12 патрони за ловна пушка и 11 куршуми. Во просториите каде престојувал неговиот син З.Ј. (52) полицијата пронашла и запленила марихуана.
„На 27.08.2025 во 11:30 часот, по претходна судска наредба, полициски службеници од Отсекот за недозволена трговија со дрога и оружје при СВР Велес, извршиле претрес во домот на Т.Ј.(84) од Велес. При претресот, биле пронајдени и одземени ловен карабин „маусер“, ловна пушка „бајкал ИЖ 12“, 12 патрони за ловна пушка и 11 куршуми за ловен карабин, а во просториите каде престојувал неговиот син З.Ј.(52) била пронајдена и одземена марихуана“, велат од МВР.
Од полицијата додаваат дека за случајот е известен јавен обвинител, а против двајцата ќе следуваат кривични пријави.
