Старосната граница за фудбалерите што ќе настапуваат на Олимпијадата во Токио би можела да се подигне. Ова го побара ФИФА од Меѓународниот олиписки комитет (МОК), за да играчите кои требаше да се натпреваруваат на Олимпијадата оваа година, да можат да го сторат тоа следната година, со оглед дека игрите се одложени за 2021 година, објави ФИФА.
Учеството на Олимпискиот турнир во фудбал е ограничено на играчи под 23 години, со исклучок на тројца играчи кои имаат над 23 години. Нема старосна граница за женскиот олимписки турнир во фудбал.
Австралиската фудбалска федерација (ФФА) го поздравува овој потег.
„ФФА јасно стави до знаење дека Олимпискиот турнир во фудбал треба да се претвори во турнир за играчи под 24 години, со оглед дека ОИ е преместен во 2021 година“, се вели во соопштението на ФФА.
Работната група на ФИФА исто така посочи дека сите меѓународни натпревари закажани за јуни треба да бидат одложени поради пандемијата на коронавирус.
