Германската канцеларка Ангела Меркел вчера повика на зголемено производство на вакцини против Ковид-19 во самата Европска унија и го бранеше заедничкиот пристап на Унијата во борбата против пандемијата.
„И покрај сите тешкотии со кои се соочивме, мислам дека за време на пандемијата повторно се покажа дека е добро што ја имаме Европската унија“, им рече Меркел на пратениците во Бундестагот.
Таа експлицитно ја истакна важноста на механизмот за заедничка набавка на вакцини.
Во исто време, ја истакна потребата да се зголеми производството на вакцини против коронавирус во самата Европска унија.
„Во Велика Британија, се произведува за Велика Британија. САД не извезуваат своја вакцина. Затоа долгорочно сме зависни од тоа што го произведуваме во ЕУ”, рече Меркел, додавајќи дека ова се однесува и на годините што доаѓаат.
Таа додаде дека покрај Германија и други делови на Европа се во средиштето на третиот пандемиски бран.
„Натамошното ширење на инфекцијата мора да се запре додека е сè уште можно“, порача таа.
Во своето обраќање до јавноста Меркел ги повика сите државни истанци да бидат поуспешни во борбата против пандемијата.
„Ако се опуштиме врз основа на досега постигнатото, тоа нема да биде доволно. Мора да бидеме пофлексибилни и побрзи каде што тое е можно“, предупреди канцеларката, алудирајќи на бавниот процес на вакцинација и тестирање во Германија.
Во исто време, таа повика и на поголем оптимизам во борбата против пандемијата.
„Невозможно е да се постигне нешто ако гледаме само црно. Ќе го победиме овој вирус“, рече Меркел и додаде дека кога станува збор за процесот на вакцинација, таа ја гледа светлината на крајот од тунелот.
Канцеларката предупреди на промената што ја носи третиот пандемиски бран.
„90-годишни лица нема веќе да лежат на одделенијата за интензивна нега, туку пациенти на возраст од 50 и 60 години, кои имаат уште многу години пред себе“, рече германската канцеларка.
Можеби ќе ве интересира:
