Претседателот на Собранието, Африм Гаши, на денешниот брифинг со новинарите најави дека локалните избори би можеле да бидат распишани кон крајот на јули или почетокот на август.
Во истиот контекст, Гаши информираше дека е побарана јавна расправа во законодавниот дом за измените на Законот за локална самоуправа. Предложените измени, како што истакна, се иницирани од Министерството за локална самоуправа и се најавуваат веќе подолг период.
Тој додаде дека на следната пленарна седница, закажана за 29 април, на дневен ред се очекува да биде ставена интерпелацијата за министерот за внатрешни работи, Панче Тошковски. Интерпелацијата е поднесена од пратеничката група на партијата Левица.
„Причина за интерпелацијата е поради тоа што Тошковски, од позиција на министер за внатрешни работи, грубо ја занемарил и несоодветно ја извршувал својата јавна функција, постапувајќи нестручно, непрофесионално, несовесно и неодговорно поради што имало низа противзаконски дејствија, скандали и кадрови поместувања во МВР“, рече пратеникот на Левица, Сашко Јанчев на 14 април кога информираше дека ја поднесуваат интерпелацијата.
