Била Зора ја запалиле во два века пред нашата ера, но од лицето на земјата, некогашната престолнина на пајонските кралеви може да ја збрише негрижата на институциите.
Последните истражувања на овој археолошки локалитет во близина на Свети Николе се завршени пред речиси три години. Ископаното превентивно е заштитено, но е далеку од доволно за да го спаси од забот на времето. Скалилата што се единствени на Балканот по начинот на градба се изронети, а пред неколку години падна и една од фреските на ѕидовите.
Музејот во Свети Николе е надлежен за археолошките ископувања на Била Зора, но за заштита и конзервација е одговорен Заводот за заштита на спомениците и музеј Штип од каде велат дека тие ја завршиле својата работа, се чека на пари од Министерството за култура.
Сега на локалитетот е прогласен мораториум за понатамошни ископувања. Добра вест е дека се обезбедени 400.000 денари за конзервација на околу 400 артефакти пронајдени во десетгодишните ископувања на локалитетот. А додека се чекаат пари за реална заштита, Била Зора ќе влезе во виртуелниот свет.
Досега од Била Зора е истражена само една третина од палатата, а ископувањата на некои делови од локалиетот што се протега на 32 хектари се уште не се ни почнати. Во меѓувреме музејот во Свети Николе прави и дигитална мапа на сите места со археолошко наследство во општината. Детектирани се околу 200 вакви локации. Оваа мапа ќе треба да послужи и за полесно казнување на дибвите копачи.
Moжеби ќе ве интересира:
