„Маркард Македонија“, една од водечките индустриски компании во земјава, одбележа десет години работење со свечен настан во својот производствен погон во Велес. Компанијата, која брои над 700 вработени и бележи континуиран раст на извозот, денес е препознаена како стратешки економски играч со силно присуство и на домашниот и на странскиот пазар.
Јубилејот беше прославен во присуство на претставници од институции, партнери, вработени и гости, а вниманието беше насочено кон резултатите постигнати во изминатата деценија и визијата за идниот развој.
Генералниот директор Ирген Шмит потенцираше дека успехот на компанијата се должи на инвестициите во луѓе, технологија и партнерства. Тој најави нови развојни проекти и проширување на капацитетите, при што ја нагласи важноста на поддршката од локалната самоуправа, како и соработката со средното стручно училиште „Коле Неделковски“, преку дуалниот модел на образование кој, според него, претставува клучна алка за подготвена и стручна работна сила.
Од Делегацијата на германското стопанство во Македонија беше истакнато дека „Маркард“ е позитивен пример за долгорочна инвестиција со конкретен економски ефект, а соработката меѓу Македонија и Германија сè повеќе се продлабочува преку вакви проекти.
Заменик-министерот за економија и труд, Маријан Ристески, во своето обраќање посочи дека Владата останува посветена на креирање поволна бизнис клима и дека ваквите компании се „ветер во грб“ за македонската економија.
Настанот заврши со обиколка на производствениот погон и неформално дружење, при што присутните имаа можност одблиску да се запознаат со технолошките процеси и работната култура која „Маркард Македонија“ ја негува веќе една деценија.
