Библиотекарското здружение на Македонија одлучи Локалната библиотека „Гоце Делчев“ – Велес да е добитник на признанието „Библиотека на годината“ за 2024 година, во категоријата јавни библиотеки.
Ова престижно признание претставува признание за посветената работа на библиотеката, нејзините континуирани активности, културни програми и постојаната грижа за развој на читачките навики кај сите генерации.
Во рамките на доделувањето признанија во други категории, признанието за најдобра библиотека во категоријата високошколски библиотеки ѝ беше доделено на библиотеката „Макс ван дер Штул“ при Универзитетот на Југоисточна Европа во Тетово. Во категоријата библиотеки при основни училишта, највисокото признание го доби библиотеката при ОУ „Никола Карев“ од Кочани.
Свеченото доделување на признанијата ќе се одржи на 15 мај 2024 година во хотел „Глориус“, за време на официјалното отворање на 5. Меѓународна конференција на библиотекари, што дополнително ќе ја истакне важноста на оваа награда и придонесот на библиотеките во развојот на културниот живот во земјата.
