Со настапот на најмалите велешанчиња, децата од Детската градинка „Димче Мирчев“, денеска свечено беше пуштено во употреба новоизграденото езерце во Градскиот парк. Градоначалникот на Велес Аце Коцевски изрази голема благодарност до членовите на Советот на Општина Велес и на вработените на Јавното комунално претпријатие „Дервен“ за изградбата на овој објект.
„Би сакал да кажам дека ова место кое до пред извесно време беше прилично запоставено, иако некогаш беше култно место, кое повозрасните го паметат по Црвенкапа, го претворивме во едно убаво катче, во кое верувам дека ќе уживаат, пред сѐ, најмладите, дечињата, а потоа и повозрасните, дека тука ќе се случуваат многу убави моменти, ќе никнуваат нови пријателства, другарства, се разбира и нови љубови“, рече Коцевски.
Езерцето се протега на површина од 1000 квадратни метри, се користи природна изворска вода, просторот околу него е хортикултурно уреден, збогатен со клупи и корпи за отпадоци. За изградба на езерцето Општина Велес обезбеди пари од сопствениот буџет, преку Програмата за заштита на животната средина за 2020 година, во висина од два милиони денари.
Денешниот настан дополнително беше збогатен и со изведбата на децата од балетското студио „Анабела“. Свеченото отворање на езерцето е во пресрет на Светскиот ден на животната средина, 5 Јуни.
Градоначалникот Коцевски упати апел до сите граѓанки и граѓани да го чуваат ова прекрасно катче како свое, затоа што, не само што имаме право да живееме во здрава и чиста средина туку имаме и обврска да ја чуваме и заштитуваме.
Можеби ќе ве интересира:
