Вчера Велес беше домаќин на второто коло од Европскиот куп во кајак на диви води – дисциплина спуст, каде што учествуваа најдобрите кајакари од Југоисточна Европа. Натпреварите се одржаа на реката Вардар, каде што природните услови и солидната организација овозможија возбудливи трки и врвни резултати.
Во дисциплината спринт, во К1 сениори победи Невен Клеут од Србија, пред Љубомир Спасиќ од Македонија, додека третото место го поделија Јосип Слошњак и Александар Златаров. Во јуниорската К1 категорија, победата му припадна на Илија Клеут, додека кај Ц1 сениорите најдобар беше Павле Здравкович. Во Ц2 категоријата доминираа Јанко Пресечки и Јосип Слошњак.
Меѓу жените, Ксенија Плазинич (СРБ) беше најбрза кај сениорките, а Уна Лукич повторно доминираше кај јуниорките. Младите натпреварувачи Андреј Апостолов и Тамара Драшкович се издвоија со златни медали во У14 категориите, а кај најмладите (У12), Павле Лукич беше најдобар.
Велешкиот тим на ККК Арка Борец доминираше и на вчерашното второ коло во Европскиот куп, во категорија спринт освојувајќи најмногу бодови во екипна конкуренција.
