Полицијата го ослободи приведениот за заканите со бомбите и изврши претрес во неговиот дом

По извршениот службен разговор, во координација со јавното обвинителство извршен е претрес во дом на Н.Н., кој вчера беше приведен поради постоење на сомнение за поврзаност со заканите за поставени бомби во средните училишта во Скопје, соопштува МВР.

Од неговиот дом одземени се предмети за вештачење и се преземаат мерки за расчистување на случајот, велат од полицијата, а по распитот тој бил пуштен дома.

Министерството за внатрешни работи по завршија антитерористичките проверки во врска со вчерашните пријави дека девет училишта на територија на Скопје на електронските адреси добиле порака со закана за поставена бомба и утврдено е дека станува збор за лажни пријави.

Платформа именувана како ,,Конзерватив.мк” синоќа на својот фејсбук-профил објави дека нивниот член и активист Никола Николовски е приведеното лице за наводна поврзаност со заканите за поставени бомби кои ги добија повеќе средни училишта во главниот град, но дека тој е неправедно уапсен.

Во описот за работата на платформата ,,Конзерватив.мк”, објавена на нивната веб-страница, се наведува оти станува збор за движење чии примарни заложби се демократија, слободен пазар, здрава животна средина, како и конзерватизмот како идеологија и класичниот либерализам како десно или центар-десни ориентации.

На Фејсбук-профилот на платформата ,,Кознерватив.мк”, меѓу другото, може да се забележат објави од пред неколку месеци во кои ја повикуваат Владата да го отфрли францускиот предлог и се дава поддршка на протестот организиран од ВМРО-ДПМНЕ на 5 јули.

Можеби ќе ве интересира: