Полициските службеници од СВР Велес вчера утрото привеле 34-годишен велешанец, осомничен дека ограбил и физички нападнал 70-годишна сограѓанка во нејзиниот дом. Инцидентот се случил на 31 август околу 7:20 часот, кога жената, идентификувана како Ѓ.Д., го повикала А.Р. (34) во својот дом за да и помогне. Наместо тоа, тој и го одзел паричникот во кој имало пари и лични документи, по што заминал.
Кога постарата жена забележала дека и недостасува паричникот и повторно го повикала за да и го врати, осомничениот се појавил во нејзиниот двор, каде што не само што одбил да го врати, туку и физички ја нападнал и и се заканувал.
А.Р. бил веднаш лишен од слобода и спроведен во полициска станица. За случајот е известен јавен обвинител, а по документирање на настанот против него ќе биде поднесена соодветна кривична пријава.
