![](https://batali.net/wp-content/uploads/image-253.png)
Писателот Томислав Османли е годинешниот добитник на Рациновото признание за литература. Тој ја добива оваа награда за својата последна прозна книга „Парадоксикон“, која е вкупно 28-ма во неговата творечка биографија. Жири комисијата на меѓународната поетска манифестација „Рацинови средби“ ја донела одлуката, откако на конкурсот пристигнале повеќе квалитетни дела од македонски автори.
„Недвосмислено и едногласно констатиравме дека Томислав Османли е прво една фигура за која што нема сомнение дека е веќе составен дел на македонската книжевна, културна и творечка сцена и дека во таа смисла ќе биде достоинствен носител на Рациновото признание“, рече академик Катица Ќулавкова, која е претседател на жири комисијата на „Рацинови средби“.
![](https://batali.net/wp-content/uploads/image-254.png)
Наградена книга „Пасадоксикон“ на Османли ја дава својата фантастична визија на тревожната современост, која – како што самиот вели – не престанува каприциозно и парадоксално да нѐ населува. Османли вели дека оваа награда му е посебно драга и вети дека ќе продолжи да ги негува традициите на двете сјајни вертикали – космополитската и вертикалата на македонскиот јазик.
„Нашиот македонски јазик често пати знае да биде предмет и на напади, предмет на негации, предмет на релативизации, како што сме сведоци од некои преживеани структури во блиските средини, дека се прават несреќни и залудни обиди. Тука сме ние да го одбраниме со нашето дело, со нашето творештво, со нашите почити кон родоначелниците, а еден од нив, кој е сјајна ѕвезда заблесната во Велес, а потоа и во Македонија, но низ цела Европа е и Кочо Рацин“, рече Томислав Осмали, добитник на „Рациново признание“.
Почесното Рациново признание за афирмација и популаризација на македонската литература и култура надвор од границите на земјава го добиваат Виктор Фридман од Чикаго и финскиот лингвист Јоуко Сакари Линдстет. Градоначалникот на Велес Аце Коцевски вели дека оваа манифестација се уште не го добива вистинското внимание во јавноста.
![Fridman](https://batali.net/wp-content/uploads/fridman.jpg)
„Рациновите средби, според мене, се една од трите најважни културни манифестациии во нашата земја, заедно со Охридско лето и Струшките вечери на поезијата. Сите заедно, со помош на медиумите, треба да се избориме Рациновите средби да го добијат заслуженото место во културата и уметноста во Македонија, а не да доминираат разни карневали со пагански обичаи, празијади, питијади, ракијади и се останато“, смета Аце Коцевски, градоначалник на Велес и претседател на Oрганизацискиот одбор на „Рацинови средби“.
Меѓународната поетска манифестација „Рацинови средби“ ќе се одржи во петок и сабота во Велес, кога ќе бидат доделени и наградите.
Можеби ќе ве интересира: