Детскиот фудбалски турнир 2025, што оваа недела се одржува во живописниот амбиент на Градскиот парк во Велес, влегува во својата завршна фаза. По возбудливите четвртфинални натпревари одиграни вчера, веќе се познати и четирите најдобри екипи што ќе се борат за трофејот.
Во првиот четвртфинален дуел, екипата на Тополка доминираше и го декласираше тимот на Блум Бренд со убедливи 5:0. Подеднакво сигурен настап имаше и Мал Ајакс, кој славеше со 4:0 против Работник Галактикос. Најголема ефикасност беше прикажана во натпреварот помеѓу кавадаречката екипа Наш’то Маало и тимот на Јаболчиште, каде што Наш’то Маало славеше со спектакуларни 11:4. Последниот полуфиналист се избори преку локалното дерби, Борец 1919 ја совлада екипата на Којник со резултат 5:2.
Полуфиналните натпревари се закажани за понеделник, а двојките се следни:
Тополка – Борец 1919
Мал Ајакс – Наш’то Маало
Финалниот натпревар, исто така, ќе се одигра истиот ден, веднаш по полуфиналните пресметки. Атмосферата во Градскиот парк ветува уште еден ден исполнет со спортски дух, младински елан и љубов кон фудбалот.
