Велес повторно има причина за гордост! На државното јуниорско првенство во кајак слалом, кое денес се одржа во Демир Капија, одличен настап имаше велешкиот кајак клуб „Бабуна“, кој со низа одлични резултати го освои првото место во вкупниот пласман и ја понесе титулата државен јуниорски првак.
Главната ѕвезда на првенството беше велешанецот Кристијан Смилев, кој по втор пат по ред стана државен првак во K-1 мажи, повторно газејќи ја конкуренцијата со импресивна трка. Со ова Смилев го потврди својот статус како еден од најперспективните млади спортисти во земјава. До него, уште еден велешки бисер, Марко Варналиев, се избори за сребрен медал, обезбедувајќи му на Бабуна двојна радост во машката конкуренција и уште еден подиум за градот Велес. Место на подиумот имаше и за Павел Димовски од КК Гемиџии 1903 од Велес.
Успесите на велешаните не застануваат тука. Во женската конкуренција, Бојана Нацева, исто така член на Бабуна, се избори за сребро во K-1 жени, покажувајќи дека клубот гради силна база и во женскиот кајак. Првото место во женска конкуренција го освои уште една велешанка, Марија Пановска од Кајакрскиот клуб Гемиџии 1903. Дополнителен сјај на настапот на Бабуна му даде тимската трка во 3xK1, каде велешани повторно стигнаа до сребрен медал.
Со вакви индивидуални и екипни достигнувања, велешкиот клуб Бабуна е апсолутен шампион на Македонија во јуниорска конкуренција, носејќи му голема победа на градот Велес и потврдувајќи дека кајакот има сериозна иднина.
