(ВИДЕО) Нафта тече низ Вардар кај Градскиот парк

Големи дамки од нафта утрово можат да се забележат во водите на реката Вардар. Снимките кои ни ги испратија читатели се направени утрово околу 7:30 часот.

Посетителите кои утрово се рекреираат во паркот, велат дека од Вардар се шири и силна миризба на нафта. Засега е непознато кој ја испуштил нафтата во водите на реката.

Вардар е река со загаденост од највисок, петти степен. На голем дел од неговото течение капењето е забрането. Дел од спортските риболовни друштва дури и не ја препорачуваат рибата од Вардар за јадење.

Без прочистителни станици, Вардар го труе канализациски и индустриски отпад. Институтот за јавно здравје лани откри и присуство на тешки метали во водите на најголемата река во земјава.