После позитивниот тест на коронавирус на министерот за внатрешни работи Оливер Спасовски, кој присуствуваше на конгресот на СДСМ во неделата, премиерот и претседателот на СДСМ Зоран Заев за ТВ21 вели дека немал директни контакти со Спасовски надвор од протоколите, но и дека ќе направи тест за Ковид-19.
„Немав директни контакти со Оливер Спасовски надвор од здравствените протоколи за лична заштита. Секогаш држевме дистанца и секогаш носевме маска согласно здравствените протоколи. Односно, додека еден зборува без маска на лицето, другите носат маска, иако се одржуваже и неопходната дистанца. Сепак, тест секако ќе направам, затоа што така е паметно и одговорно“, рече Заев.
Вчера премиерот Зоран Заев на велешкото езеро „Младост“ присуствуваше на одбележувањето на 75 години од формирањето на ОНН, заедно со министерот за внатрешни работи Оливер Спасовски, а покрај нив, присуствуваа и министерот за животна средина и просторно планирање, Насер Нуредини, како и министерот за земјоделство, шумарство и водостопанство, Арјанит Хоџа.
Ден претходно се одржа дигиталниот конгрес на СДСМ, каде присуствуваа премиерот Заев, министерот Спасовски и уште неколку функционери од раководството на СДСМ и министри од Владата, вклучително и Радмила Шеќеринска и Љупчо Николовски.
Можеби ќе ве интересира:
