BATALI.net Батали работа, ко да ти е сабота 
Филмот „Стела“, чија премиера се одржа на 18 септември, го отпочна своето патување до публиката. Иако е снимен лани и готов уште пред шест месеци, поради ковид-кризата, тој е промовиран овој месец, во рамките на отворањето на филмскиот фестивал „Синедејс“.
Во огромната филмска екипа која работеше на овој филм, се наоѓаат и двајца велешани, без кои, филмот немаше да изгледа така, како што го замислил режисерот Стојан Вујичиќ.
Монтажата на филмот ја потпишува Данчо Стефков, човек кој долги години е присутен во филмската индустрија во земјава. Тој е автор или ко-автор на многу документарни и играни филмови, како „Македонска Миланска скала“, поетскиот филм „Елегија за тебе“, истражувачкиот документарец „Гробот на Панко Брашнаров“, играно-документарниот филм „Последниот Македонец“ и уште многу други, а пред „Стела“, работеше и на играниот филм „Дедо и внук“. Стефков е сопственик на „Тулип продукција“, која, пак се потпишува на бројни музички и комерцијални фимови.
Еден од главните ликови во „Стела“ е истоименото куче – шарпланинец, кое е сврзувачкото ткиво на разделеното семејство од филмот. За да ги „одигра“ сцените така како што режисерот Вујичиќ замислил, за Стела беше задолжен дресерот, велешанецот Ристе Гиовски. Тој е по професија дресер, а оваа работа професионално ја извршува во АРМ, каде што е вработен. Гиовски е сопственик на стационарот за кучиња „Гиовски тим“, кој се наоѓа во атарот на село Војница, велешко.
„Стела“ е првиот детски и семеен филм во Македонија. Во него, покрај шарпланинката Стела, главните улоги ги толкуваат и 13-годишниот Петар Маниќ кому ова му е прва улога, Дејан Лилиќ, Тони Михајловски, Симеон Дамески и Христина Поповиќ. Сценариото е на Ева Камчевска, кинематографијата е на Ѓорѓи Клинчаров, костимограф на филмот е Милена Миленковиќ, а снимател на звукот е Срѓан Бајски. „Стела“ е во продукција на „Дрим Фектори“ и е македонско-германско-српска копродукција.
Погледнете го разговорот со мотажерот Данчо Стефков и дресерот на Стела Ристе Гиовски, снимени на премиерата на филмот.
Можеби ќе ве интересира: