(ФОТО) Ракометар на Борец физички нападнат од вработен во салата во скопски Чаир

Тежок инцидент се случи денеска во спортската сала во скопски Чаир, на одигрувањето на натпреварите од редовното коло во машката ракометна Прва лига. Повреден е младиот ракометар на Борец Јован Атанасовски, откако бил нападнат од вработен во спортската сала „7 Март“.

На натпреварот против Аеродром Атанасовски добил црвен картон и заминал кон соблекувалната. Во тој момент, вработен во салата задолжен за одржувањето на објектот почнал да го удира со тупаници по главата и градите младиот ракометар на Борец, обвинувајќи го дека пресилно ја притиснал рачката на вратата од соблекувалната.

„На денешниот натпревар во помеѓу ГРК Борец и Аеродром, на 10 секунди пред крајот на мечот, по добивањето на црвениот картон, нашиот играч, кој инаку е сè уште малолетен, додека го напуштал теренот, бил удрен неколку пати со тупаници по главата и телото од лице вработено да ја одржува салата „7 Март“, во која настапува домаќинот на турнирот РК Ринија. По пристигнувањето во Велес, на нашиот играч му е пружена медицинска помош, при што е констатирана телесна повреда“, велат од управата на Борец.

Велешани инцидентот го пријавиле во Ракометната федерација на Македонија, по што очекуваат реакција, а случајот е пријавен и во полиција. РК Борец денеска учествуваше турнирот од четвртото коло на Првата лига, кој се играше во салата во скопски Чаир. Натпреварот против Аеродром го загуби со 45:24.

Можеби ќе ве интересира: